大阪一日遊 – 勁食潮買 TRACK-001

去東京一定去築地，去大阪大部分人都去黑門市場，想再地道啲，推介大家去福島區嘅中央市場，下晝仲可以去附近潮牌同設計品牌林立嘅南堀江行街！

開始行之前可以先品嚐下刺身嘅鮮味！創業超過一個世紀，由1907年開業至今，ゑんどう寿司已經傳到第四代，喺正漁市場食材當然新鮮！壽司MENU有4款SET可以揀，每SET五款，每SET大概1200円，海膽、拖羅、鯛都有得食！

中央市場交通好方便，由地鐵千日前線玉川站步行約10分鐘就到，除咗好似築地咁有漁市場，仲有水果、蔬菜、乾物、漬物嘅批發中心。業內嘅早晨拍賣和批發遊客雖然無法參與競投，但都可以感受下熱鬧嘅氣氛。有興趣嘅仲可以行下批發市場嘅參觀路線(需預約)。

行完中央市場，你一定好想繼續食多啲魚生、海鮮，午餐可以行遠少少去對岸嘅中之島漁港。中之島漁港其實都有海鮮批發，但規模當然比中央市場細，所以重點係佢戶外嘅海鮮BBQ大排檔！！蠔、各種貝類、蟹、螺、蝦、魚，對住個海即燒即食！

立花通 ORANGE STREET有好多潮牌、畫廊、設計家品傢俬，A BATHING APE、X-GIRL、HYSTERIC MINI、Head Porter等都有分店。除咗大牌子，大家不妨留意下日本本地設計品牌同特色店舖：

(a) UES：全日本人手製作牛仔褲，總店喺代官山，仲有恤衫、T恤、飾品等
(b) Symphony Chiffon：電視、雜誌人侎迷你雪芳蛋糕，鬆軟香濃
(c) HUMOR SHOP：集合A-net旗下多個日系年青品牌：TSUMORI CHISATO、ZUCCa、Ne-net、mercibeaucoup，價錢大眾化，女仕必行！
(d) BIOTOP：結合「綠化」和「FASHION」嘅服飾品牌，仲有盆栽同餐廳
(e) Timeless Comfort：精美廚具、家品、傢俬，款式獨特
(f) ASOKO：價錢大眾化嘅家品雜貨品，款式顏色一樣多，連稅108~864円

設計家品傢俬店Timeless Comfort地下有咖啡室，甜點鹹點一應俱全，推介個樣同味道一樣咁好嘅PANCAKE！位於立花通中間，行到攰坐低叉叉電啱哂！

主打炭火烤雞，鮮雞由日本農場產地直送，配合喜馬拉亞岩鹽，各款串燒、燒物，鮮嫰多汁！