之前介紹「御宿野乃難波酒店」唔少朋友都好有興趣，但隨住酒店過咗新張期同知外度高咗，價格上調之餘亦難BOOK咗，所以今次介紹另一間大阪市區天然溫泉酒店 – 夕霧の湯 Dormy Inn PREMIUM 難波。同樣係大型酒店集團 Dormy Inn 旗下，於2013年開業，位於地鐵長堀橋站同日本橋站中間(約5分鐘步行距離)，交通方便！鄰近道頓堀、心齋橋、千日前道具屋筋商店街、難波商圈、黑門市場(5-10分鐘步行距離)，行街、食野、浸溫泉一站式歎世界！
- 地址：〒 542-0082 大阪府大阪市中央区島之内2-14-23
- 交通：地鐵「長堀橋站」/「日本橋站」步行約5分鐘
- 機場交通：搭乘南海電鐵(空港線)至「天下茶屋站」，轉乖地鐵堺筋線至「長堀橋站」/「日本橋站」(車程約1小時)
- 電子地圖：按此
- 附近景點：
- 心齋橋、道頓堀：5分鐘
- 黑門市場：10分鐘
- 難波站商圈：10分鐘
- 千日前道具屋筋商店街：10分鐘
有別於「御宿野乃難波酒店」嘅全和風設計，Dormy Inn PREMIUM 難波設計偏向商務酒店，大堂至房間都係西式設計為主(設有和洋室客房)，不過如圖所見房間比較細，典型日本酒店客房大小(15-27m2)。不過麻雀雖小，酒店所有客房均使用SERTA床褥，令住客可以瞓覺好嘅！設備亦齊全：浴巾、風筒、WIFI、電視、電熱水壺、冰箱、樽裝水、拖鞋、盥洗用品。
酒店內設有男女分開嘅天然溫泉大浴場「夕霧之湯」，半露天溫泉每日由15:00－翌日10:00開放使用（01:00－05:00桑拿房暫停使用）。「夕霧之湯」屬於氡溫泉，有助舒緩肌肉痛、關節痛、神經痛、寒症、肩周炎、恢復疲勞。
酒店提供自助早餐，供應章魚燒、炸串燒、燉牛肉、煎餅等多種和食和西式餐點。酒店包早餐就好常見，呢間仲有免費宵夜拉麵提供，每日21:00－23:00供應小碗醬油拉麵！
酒店地段不錯5-10分鐘步行距離就已經有齊車站、購物點、食肆：
酒店距離購物點道頓堀、心齋橋筋商店街、戎橋筋商店街、千日前道具屋筋商店街、BIC CAMERA、難波商圈(難波WALKS地下街、難波PARKS/CITY等商場、高島屋百貨公司)，全部都只係10分鐘步行距離！一街都係藥妝店，行街買野最方便！
除咗近購物點，酒店亦好近「黑門市場」！黑門市場被稱為大阪嘅廚房，有好多新鮮食材即買即食！刺身、海膽、河豚、貝類等新鮮海產，仲有黑毛和牛、同埋日本新鮮水果！日日去食刺身做早餐都得！回程個日仲可以買日本水果做手信添！唔行黑門市場附近亦有好多食肆，出名嘅有蟹道樂、一蘭拉麵個啲旅遊書推介嘅餐廳。如果想食特別啲，可以試下杜如風推介嘅「蟹しぐれ」、自己釣自己食嘅「釣船茶屋ざうお」、同地道大排檔風味「魚圓」
